Nhar il-5 u
s-6 ta’ Diċembru 2022, Malta pparteċipat fir-raba’ Laqgħa Ministerjali tal- Forum
Arċipelaġiku tal-Gżejjer Stati ( AIS Forum ) li ttella’ ġewwa l-gżira ta’ Bali,
fl-Indoneżija. Dan il-Forum jgħaqqad fih 47 Stati Arċipelaġiċi u Gżejjer sabiex
titrawwem ko-operazzjoni fuq erba’ temi li huma l-ekonomija blu,
il-mitigazzjoni tat-tibdil fil-klima u d-diżastri, it-tniġġiż tal-baħar
bil-iskart tal-plastik, u l-governanza tajba tal-oċejani u l-ibħra.
Għal din
il-Konferenza, Malta kienet rrapreżentat mill-Kummissarju Għoli ta’ Malta
għall-Indja, reżidenti fi New Delhi, l-E.T. Reuben Gauci, li vvjaġġa mill-Indja
lejn l-Indoneżija speċifikament biex jieħu sehem f’ din il-Konferenza.
It-tema ta’
din ir-raba’ laqgħa Ministerjali kienet :
“ L-elevazzjoni tal- kollaborazzjoni tal-Forum AIS għal Sostennibilita’
u Oċejani b’ saħħithom.” Matul
il-Konferenza, il-Kummissarju Għoli Gauci qara l-istqarrija tal-Ministru
għall-Affarijiet Barranin, Ewropej u Kummerċ, l-Onor Ian Borg, liema stqarrija
aċċennat fuq l-importanza tal-ekonomija blu li hija equivalenti għad-daqs
tas-seba’ l-akbar ekonomija tad-dinja.
L-intervent
ta’ Malta fil-Forum AIS kompla jenfassizza li mill-akwakultura sal-produzzjoni tal-enerġija offshore,
l-iżvilupp
tal-Ekonomija Blu Sostenibbli tista’ ttaffi it-tibdil fil-Klima, toħloq impiegi
vasti fl-industriji blu u ħodor, u tipprovdi
lill- pjaneta’ b’ mediċini u nutrizzjonijiet sani li huma meħtieġa għal
ġejjieni sikur.
Fl-istqarrija,
Malta semmiet żewġ proġetti li ġew żviluppati mill-Universita’ ta’ Malta.
L-ewwel proġett imsemmi kien l-“ Andromeda microplastic citizen
science campaign ” li huwa smartphone app li tuża l-intelliġenza artifiċjali sabiex tanalizza r-ritratti tal-mikroplastiċi
meħuda mill-utent tal-app, u li tgħallem lill-utenti kif jiddentifikaw dawn
l-oġġetti tal-plastik. Din l-app maħluqa Malta qegħda tintuża fl- Ewropa
bħalissa. It-tieni proġett li ssemma
huwa dak tal-iżvilupp tal-batteriji li jaħżnu l-enerġija bħala soluzzjoni
għall-enerġija offshore, liema proġett iġib l-isem ta’ FLASC [ Floating Liquid-piston Accumulator using Seawater
under Compression ].
Fl-aħħar tal-intervent Malta ssottolineat li l-Edukazzjoni hija alleat importanti għall-iżvilupp ta’
ekonomija blu sostenibbli u infurmat li skejjel senior f’ Malta qegħdin
jipparteċipaw fl-inizjattiva Skejjel Blu. Ingħadd ukoll li Malta hija
pużizzjonata tajjeb sabiex toffri tisħiħ fil-kapaċita’ tal-governanza
tal-oċejani permezz tal-International Ocean Institute, li jinsab f’ Malta u li
għandu ċentri madwar id-dinja, kif ukoll l- International Maritime Law Institute li jinsab
ukoll ġewwa Malta.