It-58 anniversarju mill-kisba tal-Indipendenza ta’
Malta ġie ċċelebrat fil-Ġermanja fi tliet avvenimenti separati. Fis-7 ta’
Settembru, l-Ambaxxatur ta’ Malta għall-Ġermanja, Dr Vanni Xuereb, u żewġu,
Charlò Baldacchino, ospitaw lill-konsli onorarji ta’ Malta fil-Ġermanja kif
ukoll rappreżentanti mill-Awtorità Maltija għat-Turiżmu, immexxija miċ-Chairman
tagħha Dr Gavin Gulia, u mill-linja tal-ajru Air Malta, għal buffet
fir-Residenza tagħhom f’Berlin. L-għada, l-Ambaxxatur Xuereb u s-Sur
Baldacchino ospitaw ir-riċeviment tal-“Malta Day” f’lukanda f’Mitte-Berlin.
Ir-riċeviment ġie organizzat b’kollaborazzjoni mal-Awtorità Maltija
għat-Turiżmu. Qabel ir-riċeviment, l-MTA organizzat diversi workshops
għall-operaturi tat-turiżmu fir-reġjuni ta’ Berlin-Brandenburg.
Fost dawk li attendew għar-riċeviment kienu membri
tal-Parlament Federali Ġermaniż, uffiċjali mill-uffiċċju tal-President Federali
u mill-Gvern Federali, ambaxxaturi u membri oħra tal-korp diplomatiku,
il-President tal-“German-Maltese
Association”, id-Direttur taċ-Ċentru Malti fl-Università ta’ Bremen, Maltin li
bħalissa qed joqogħdu f’Berlin, operaturi tat-turiżmu, u ġurnalisti.
Il-mistednin ġew indirizzati mill-Ambaxxatur Xuereb
u minn Dr Gulia, fejn dan tal-aħħar għamel diskors f’isem il-Ministru
għat-Turiżmu, Clayton Bartolo. Peress li kienet għadha kemm tħabbret il-mewt tar-Reġina
Eliżabetta II, l-Ambaxxatur Xuereb beda d-diskors billi esprima s-sogħba tiegħu
u ta ġieħ, u fakkar kif ir-Reġina Eliżabetta II kienet l-ewwel Kap tal-Stat
Malti wara l-indipendenza sakemm Malta saret Repubblika fl-1974. Ġiet osservata
minuta ta’ silenzju bħala sinjal ta' rispett.
L-Ambaxxatur ipproċeda billi enfasizza
r-relazzjonijiet bilaterali eċċellenti bejn Malta u l-Ġermanja li komplew
jiffjorixxu tul is-snin, u enfasizza l-importanza tal-għaqda Ewropea,
speċjalment fl-ambitu tal-gwerra tar-Russja fl-Ukrajna. L-Ambaxxatur Xuereb
tkellem ukoll dwar il-kooperazzjoni bejn Malta u l-Ġermanja fuq diversi
livelli, minn kummerċ sa edukazzjoni, kultura u turiżmu fost oħrajn.
Riċeviment ieħor sar fil-21 ta’ Settembru
f’Heidelberg, Baden-Württemberg. Din kienet ospitata mill-Konslu Onorarju ta’
Malta f’Baden-Württemberg, Dr Rainer Dulger u martu s-Sinjura Christina Dulger.
L-Ambaxxatur Xuereb u s-Sur Baldacchino kienu l-mistednin tal-unur.
L-Ambaxxatur għamel ukoll indirizz qasir li matulu reġa’ enfasizza
r-relazzjonijiet eċċellenti bejn Malta u l-Ġermanja. Huwa rringrazzja wkoll lil
Dr Dulger għall-irwol tiegħu bħala Konslu Onorarju u talli għażel lil Malta
bħala wieħed mill-pajjiżi li fihom twaqqafet sussidjarja tal-kumpanija tiegħu
li għandha l-kwartieri ġenerali tagħha f’Heidelberg. Fil-fatt, l-għada,
l-Ambaxxatur Xuereb u s-Sur Baldacchino kellhom ukoll l-opportunità li jżuru
l-Kwartieri Ġenerali u l-impjant tal-ProMinent, id-ditta tal-manifattura
mwaqqfa mill-mibki Dr Viktor Dulger fis-sittinijiet u li għandha wkoll
sussidjarja f’Malta.