Nhar it-Tnejn 7 ta’ Novembru 2022, fuq
inizjattiva tar-Rappreżentanza Permanenti ta’ Malta fil-Kunsill tal-Ewropa,
il-Ministeru għall-Affarijiet Barranin u Ewropej u l-Kummerċ flimkien
mal-Istitut għall-Istudji Ewropej u d-Dipartiment tal-Liġi Ewropea u
Komparattiva fi ħdan l-Fakulta tal-Liġi ta’ l-Università ta’ Malta żamm dibattitu
dwar 'Il-Konvenzjoni Ewropea dwar id-Drittijiet tal-Bniedem: l-Applikazzjoni
tagħha, Suċċessi, Sfidi u Opportunitajiet', bl-appoġġ tal-Għaqda Studenti
tal-Liġi (GħSL), l-Assoċjazzjoni Ewropea tal-Istudenti tal-Liġi (ELSA) u
l-Organizzazzjoni tal-Istudji Ewropej (ESO).
Fid-diskorsi introduttorji tagħhom,
ir-Rappreżentant Permanenti ta’ Malta għall-Kunsill tal-Ewropa, l-E.T. Lorenzo
Vella, u d-Deputat Segretarju Ġenerali tal-Kunsill tal-Ewropa, l-E.T. Bjørn
Berge, enfasizzaw l-irwol importanti tal-Kunsill tal-Ewropa, b'mod partikolari
s-sinifikat tal-Konvenzjoni Ewropea dwar id-Drittijiet tal-Bniedem (KEDB) u
l-Qorti Ewropea tad-Drittijiet tal-Bniedem (QEDB). L-Ambaxxatur Lorenzo Vella
tkellem ukoll dwar il-Presidenza ta’ Malta tal-Kumitat tal-Ministri f’Mejju
2025 u l-kontribuzzjoni finanzjarja volontarja ta’ €20,000 li se ssir minn
Malta din is-sena lill-Qorti ta’ Strasburgu biex tindirizza l-backlog tal-kawżi.
Bosta esperti ta' profil għoli
kkontribwew għad-dibattitu f'żewġ panels, fosthom il-Prim Imħallef Emeritus Dr
Vincent A. De Gaetano (eks Imħallef u President tas-Sezzjoni tal-QEDB), l-Onor.
Sinjura Imħallef Consuelo Scerri Herrera (Imħallef tal-Qrati Superjuri ta’
Malta), l-Onor. Sur Imħallef Francesco Depasquale (Imħallef tal-Qrati Superjuri ta’ Malta),
l-Onor. Sinjura Imħallef Lorraine Schembri Orland (Imħallef tal-QEDB), Dr
Chrisopher Soler (Avukat tal-Istat ta’ Malta u Aġent tal-Gvern għall-QEDB),
is-Sinjura Claire Ovey (Kap tad-Dipartiment tal-Eżekuzzjoni tas-Sentenzi
tal-QEDB fil-Kunsill tal-Ewropa), kif ukoll Dr Francesca Camilleri Vettiger
(Deputat Rappreżentant Permanenti ta’ Malta għall-Kunsill tal-Ewropa). L-ewwel
panel iffoka fuq l-impatt tal-Konvenzjoni fuq il-protezzjoni u l-promozzjoni
tad-drittijiet tal-bniedem fl-Ewropa u f’Malta matul is-snin u t-tieni panel
iffoka fuq l-isfidi u l-opportunitajiet attwali u futuri għall-effettività u
l-integrità tas-sistema tal-Konvenzjoni.
Dan l-avveniment
immarka t-72 anniversarju mill-adozzjoni tal-KEDB u ġie organizzat b’kontribut
għall-proġett ta’ viżibbiltà tal-Kunsill tal-Ewropa li qed jitmexxa mid-Deputat
Segretarju Ġenerali.
Fil-marġini ta’ dan
l-avveniment, l-Onor. Ministru
għall-Affarijiet Barranin u Ewropej u l-Kummerċ, Dr Ian Borg, u kif ukoll
l-Onor. Ministru għall-Ġustizzja, Dr Jonathan Attard, laqgħu lid-Deputat
Segretarju Ġenerali Berge għal laqgħa bilaterali. L-Ambaxxatur Lorenzo Vella
akkumpanja lill-Onor. Ministri fiż-żewġ laqgħat bilaterali li ffukaw fuq
it-tħejjijiet għall-Presidenza tal-Kumitat tal-Ministri, ir-rwol importanti li
għandha Malta fi ħdan l-istrutturi tal-Kunsill tal-Ewropa u l-progress
sinifikanti li rreġistrat fir-rigward tad-drittijiet tal-bniedem,
id-demokrazija u l-istat tad-dritt wara l-bosta riformi li saru f’dawn l-aħħar
snin.
